Job 38

a 38.7 Par. 3.34.

d 38.31 Sohp 9.9; Eimw. 5.8.

KAUN-O ketin Sapeng Sohp

1 KAUN-O eri ketin sapeng Sohp sang nan melimel ehu, mahsanih.

KAUN-O

2 Ihs kowe me peikasalki koasoandi kan en ei kupwurokong
sang nan omw koasoi en pweipwei oh soh audepe?
3 Eri, ma kowe ohl emen, a uhda
oh sapeng peidek kat me I pahn wiahong uhk.
4 Ke mihmihki ia, ahnsou me I kapikada sampah?
Sapeng ie, ma ke me loalokong.
5 Ke ese ihs me koasoanediong sampah mwomwe?
Ihs me sohngediong powe mehn sohngpe?
Ia duwe, ke ese ihs me wiahda mepwukat?
6 Dahme kin kolokol uhr kan me kin utungada sampah?
Ihs me kin koasoanehdi takai me wia pwukakeimw en sampah?
7 Nin sohrahn en tepin ahnsowo usu kan wiakihteieu kokoul,
oh sapwellime tohnleng kan ngisingiski ar peren. ^a

8 Ihs me katekatenge oh kolokol perehpen madau, ^{▼▼ KOLOKOL PEREHPEN MADAU: Tehk 26.12.}
ni ahnsou me e kusukusupekda sang nan kapin sampah? ^c
9 Iei ngehi me koaduhpwalkihdi madau depwek kan
oh kipekihdi rotorot mosul.
10 Ngehi me kilelehdi irepen madau
oh kolokol nan dewe.
11 Ngehi me mahsanihong madau, “Ke pahn lelete wasaht, ke sohte pahn daulihala!
Omw pwuki kan pahn sawapeseng oh tokedi wasaht.”
12 Sohp, mie pak ehu nindokon omw mour nin sampah wet
me ke kamarainipeseng rahn?
13 Mie pak ehu me ke koasoanehdi pwe marain en dakarada imwin sampah,
de itikada aramas suwed kan sang wasa me re kin rukuruk ie?
14 Marain en rahn kin kasalehda dohl oh wahu kan,
duwehte likou limilim ehu.
sansal duwehte nting ehu pohn pwehl.
15 Marain en rahn nohn lingaling ong aramas suwed akan,
oh kin karompwahsang irail en kapwaiada ar tiahk suwed koasukloal kan.

16 Ke iangehr mi ni pwarer kan en nan madau kan?
Ke iangehr keid nan kepin madau?
17 Mie me kasalehionguhkehr wenihmw kan
me kin perepere sahpw rotorot en me melahr akan?
18 Ke dehdehki uwen laud en sampah?
Eri, ma ke dehdehki mepwukat koaros, a sapeng ie oh ndahdo.

19 Ke ese ia wasa marain kin kohsang ie,
de tepin rotorot?
20 Ke kak kasalehiong ira ididien wasa ira kak lel,
de kapwureiradohng wasa ira tepisang ie?
21 I uhdahn ese me ke kak, pwehki omw mahsang ira,
oh omw ipwidi mwohn sampah eh saikinte wiawihda!

22 Ke pwaralahngehr ni imwen nahk kan,
wasa I kin nekinekid ie sinoh oh keteu aihs takai?
23 I kin nekinekidohng ahnsou apwal akan,
ahnsoun pei oh mahwen.
24 Ke iangehr mi wasa ketipin kin dakada ie,
de wasa me angin palimese kin ipido sang ie?

25 Ihs me weirada dewen keteu mosul me kin mwerediong nansapw,
oh koakoahda elen melimel?
26 Ihs me kin kamwerehdi keteu wasa me sohte towe?
27 Ihs me kin kalamwurih sahpw madekeng kan,
pwe dihpw en kak wosada ie?
28 Mie semen keteu de semen pwoaik?
29 Ihs me naitikihada aihs oh sinoh,
30 me kin kahrehiong pihl eh kekeluwakala,
oh pahnsed wia-aihsla?

31 Ke kak salihpene usu kan me adaneki Pliadis,
de sapwadada selipen Oraion kan? ^d
32 Ke kak kaweid mwekimwekid en usu kan
me adaneki Pehr Laud oh Pehr Tikitik?
33 Ke ese duwen koasoandi kan en mwekid en pahnlahng,
oh ke kak kawehwehda lipwen koasoandi pwukat pohn sampah?

34 Ke kak wering depwek kan,
pwe re en koaduhpwalkinuhkedi pilen keteu?
35 Oh ma ke koasoanediong lioal en pir,
e pahn dukiong uhk oh nda, “Iet ngehi, I pahn kapwaiada”?
36 Ihs me kin ndaiong menpihr me adaneki ipis ^{▼▼ IPIS: Menpihr en kawa men nan Isip me aramas akan kin kamehlele me dene e kin pakairkihong irail me Pillap Nail pahn lapake.} me Pillap Nail pahn lapakehda,
de kihng kan me e pahn keteuda?
37 Ihs me nohn kupwurokong pwe en wadekedi depwek kan,
oh kamwerehdi keteu,
38 keteu me kin kapasapene pwelpar en sampah oh kakeluwakihala?
39 Ke kin rapahkihong kenen laion kisin mwenge,
oh kansenamwahwihkihla kisin mwengeo nah kan,
40 nindokon ar kin rukuruk nan dewerail,
de wonohn awiawih nan pasarail?
41 Ihs me kin kawenge menin pahnlahng kan,
ni ar kin pipihrseli reperepen kisin mwenge,
ni neirail kan ar kin liklikwerikin ie ar men mwengedahr?